በሕይወት መንገድ ላይ
አሉ ብዙ ወንዞች
ምንሻገራቸው
ወንዙ ፈተና ነው
ፈተናው ፈተና
አሉት እልፍ ጭንቆች።
ስንቶች ተሻገሩ፤ ስንቶች ተወሰዱ
ስንቶቹ ሰመጡ
ይኼ ነው ጥያቄው
ይኸው ነው ሚዛኑ
ይኸው ነው ልኬቱ
ሰው ከተፈጠረ
ሙት እስኪባል ድረስ
አፈር እስኪገባ
አሉት ብዙ ወንዞች
ብዙ ጓዝ ጉዝጓዞች
ለአንዳንዱ አራት፤ ለአንዳንዱም ስድስት
ለአንዳንዱም ሰባት
የሚሻገራቸው ተውጦ በስጋት
ሃኬቱም ሃሴቱ
ውድቀትና እድገቱ
የሚተረክለት፤ የሚፎከርለት
ተፈትኖ ሲያልፍ ወይ በድል ሲወጣ
ተመዝኖ ሲጎድል ወይ እኩል ሲመጣ
ስንቴ እንደሰመጠ
ስንቴ እንዳመለጠ
ወንዙ ሲመሰክር፤ ውጤቱ ሲደመር
ይኸው ነው ሚዛኑ
ይኸው ነው ልኬቱ
ኖሮ ኖሮ ሞተ የሚባልለቱ።